Archive for the 'ರಂಗಭೂಮಿ' Category

ಸಿರಿಪಾದದ ಸ್ವಗತ

(ಶ್ರೀಪಾದ ಭಟ್ಟರು ಬರೆದಿರುವ “ನಟನೆಯ ಕೈಪಿಡಿ” ಹೊತ್ತಿಗೆಗೆ ಮುನ್ನುಡಿ.

ಹಾಗೆ ನೋಡಿದರೆ ನಮ್ಮ ಶ್ರೀಪಾದ ಭಟ್ಟರು, ಈಚೆಗೆ ಅವಧಿ ವೆಬ್‌ ಪತ್ರಿಕೆಗೆ ಬರೆದ ಕೆಲವು ಲೇಖನಗಳನ್ನು ಹೊರತು ಪಡಿಸಿದರೆ ಬರೆದುದು ಕಡಿಮೆಯೇ. ಈಗ ಹೊಸದೊಂದು ಕೈಪಿಡಿಯ ಜೊತೆಗೆ ಓದುಗರ ಜೊತೆಗೆ ಸಂವಾದ ಆರಂಭಿಸಿದ್ದಾರೆ. ಇದು ನನಗೆ ವೈಯಕ್ತಿಕವಾಗಿ ಸಂತೋಷದ ವಿಷಯ. ರಂಗಭೂಮಿಯಲ್ಲಿ ಅಷ್ಟೊಂದು ಪ್ರಯೋಗ ಮಾಡಿರುವ ಇಂತಹ ಗೆಳೆಯರು ತಮ್ಮ ಅನುಭವಗಳನ್ನು ಅಕ್ಷರರೂಪದಲ್ಲಿ ಸಹ ಇರಿಸುವುದು ಅತ್ಯಗತ್ಯ. ಅದು ಇವತ್ತಿಗೆ ಹೇಗೆ ಬಳಕೆಯಾದೀತು ಎನ್ನುವುದಕ್ಕಿಂತ ನಾಳೆಯ ತಲೆಮಾರಿಗೆ ಅತ್ಯುಪಯುಕ್ತ ಆಗಬಲ್ಲದು. ಈ ಹಿನ್ನೆಲೆಯಲ್ಲಿ ಶ್ರೀಪಾದ ಭಟ್ಟರ “ನಟನೆಯ ಕೈಪಿಡಿ”ಯನ್ನು ನೋಡಬೇಕು.

ನಟನೆ ಎಂಬುದು ಅಗಾಧವಾದುದು. ಅದು ಎಷ್ಟರ ಮಟ್ಟಿಗೆ ಕೌಶಲವೋ ಅಷ್ಟೇ ಆಯಾ ವ್ಯಕ್ತಿಯ ಒಳಮುಖಿ ಪಯಣದಿಂದ ಒದಗಿ ಬರುವ ಕಲೆ. ಹಾಗಾಗಿಯೇ “ನಟನೆಯನ್ನು ಕಲಿಸಲಾಗದು” ಎಂಬ ಮಾತು ಹೇಗೆ ಅರ್ಧ ಸತ್ಯವೋ, “ನಟನೆ ಕಲಿಯಬಹುದು” ಎಂಬುದೂ ಸಹ ಅರ್ಧ ಸತ್ಯವೇ. ನಟನೆಯನ್ನು ಆಯ್ಕೆ ಮಾಡಿಕೊಂಡವರಿಗೆ ಈ ಅರ್ಧಸತ್ಯಗಳ ಹಿಂದಿನ ಪೂರ್ಣ ವಿವರವನ್ನು ಕೆಲವೇ ಮಾತುಗಳಲ್ಲಿ ದಾಟಿಸುವ ಹೊತ್ತಿಗೆಯಿದು. ಇಲ್ಲಿ ಆರಂಭಿಕ ಹಂತದವರಿಗೆ ನಟನೆಯ ಲೋಕಕ್ಕೆ ಪ್ರವೇಶವೂ ದೊರೆಯುತ್ತದೆ, ಅದಾಗಲೇ ಒಂದಷ್ಟು ದೂರ ಬಂದಿರುವವರಿಗೆ ನಟನೆಯೆಂಬ ಅಭಿವ್ಯಕ್ತಿ ಮಾಧ್ಯಮದ ಒಳತೊರೆಗಳು ಅನಾವರಣವಾಗುತ್ತವೆ. ಐದೈದು ಅಂಕಗಳ ಎರಡು ಅಧ್ಯಾಯಗಳಿವೆ ಇಲ್ಲಿ. ಮೊದಲ ಅಧ್ಯಾಯದಲ್ಲಿ ನಟನೆಯನ್ನು ಕುರಿತ ಕೆಲವು ಸಾರ್ವಕಾಲಿಕ ಸತ್ಯಗಳಿದ್ದರೆ ಎರಡನೆಯ ಅಧ್ಯಾಯದಲ್ಲಿ ನೇರವಾಗಿ ನಟರಾಗಬಲ್ಲವರ ಜೊತೆಗೆ ಸಂವಾದ ರೂಪದ ಮಾತುಗಳಿವೆ.  

ಇವುಗಳನ್ನು ಸ್ವಗತ ಎಂದು ಕರೆದೆ. ಕಾರಣವೇನೆಂದರೆ, ಇಲ್ಲಿರುವ ಮಾತುಗಳ ಮೂಲಕ ನಮ್ಮ ಸಿರಿಪಾದರು ತಮ್ಮೊಡನೆ ತಾವು ಮಾತಾಡುತ್ತಿರುವುದು ಸ್ಪಷ್ಟವಾಗಿ ತಿಳಿಯುತ್ತದೆ. ಆದರೆ ಈ ಸ್ವಗತಗಳು ನಟನೆಯನ್ನು ಕಲಿಯುವವರಿಗೆ ತಮ್ಮೊಡನೆ ಮನೆಯ ಹಿರಿಯಣ್ಣ ಆಡಿದ ಮಾತುಗಳು ಅನಿಸುವುದೂ ಹೌದು. ಹಾಗಾಗಿಯೇ ಇಲ್ಲಿರುವ ಹಲವು ಪಾಠಗಳು ನಾಲ್ಕು ದಶಕದಿಂದ ರಂಗಭೂಮಿ ಓಡನಾಟ ಇರುವ ನನಗೂ ಮತ್ತೆ ಮತ್ತೆ ಅಭ್ಯಾಸ ಮಾಡಬೇಕಾದ ಪಾಠಗಳಾಗಿವೆ.

ರಂಗ ನಟನೆಯನ್ನು ಕುರಿತು ಕನ್ನಡದಲ್ಲಿ ಹಲವು ಪುಸ್ತಕಗಳು ಬಂದಿವೆ. ಅವುಗಳಲ್ಲಿ ಕೆಲವು ಸಮೂಲಾಗ್ರವಾಗಿ ನಟನೆಯನ್ನು ಕುರಿತು ಅಭಿಪ್ರಾಯ ಹಂಚುತ್ತಾ, ಹಲವು ರಂಗಸಿದ್ಧಾಂತಗಳ ಮೂಲಕ ನಟನೆ ಎಂಬ ಕೌಶಲ ಹಾಗೂ ಕಲೆಯನ್ನು ದಾಟಿಸುವ ಪ್ರಯತ್ನ ಮಾಡುತ್ತವೆ. ನಮ್ಮ ಸಿರಿಪಾದರ ಈ ಪ್ರಯತ್ನ ಆ ಎಲ್ಲಾ ಪುಸ್ತಕಗಳಿಗಿಂತ ಭಿನ್ನವಾಗಿ ನಿಲ್ಲುತ್ತದೆ. ಇಲ್ಲಿ ಸಿದ್ಧಾಂತಗಳ ಮಾತಿಲ್ಲ. ನಟನೆಯನ್ನು ಕಲಿಯ ಹೊರಟವನಿಗೆ ಇರಬೇಕಾದ ಕಾಳಜಿಗಳ ಕುರಿತು ಮತ್ತು ಕಲಿಕೆಗೆ ಬೇಕಾದ ಪ್ರಾಥಮಿಕ ಅಭ್ಯಾಸಗಳನ್ನು ಕುರಿತು ಸರಳ ಮಾತುಗಳಿವೆ. ಅದರಿಂದಾಗಿ ಇಂತಹ ಕಿರುಹೊತ್ತಿಗೆಯು ನಟನೆಯ ಪರಿಚಯವೇ ಇಲ್ಲದವರಿಗೆ ಕೈಪಿಡಿಯಾಗುವುದಲ್ಲದೆ, ಒಂದಷ್ಟು ಹಾದಿ ಕ್ರಮಿಸಿದ ಜೀವಗಳಿಗೆ ಕೈಮರವಾಗಬಲ್ಲದು.

ಶಿರಸಿಯ ಗೆಳೆಯ ವಿಠ್ಠಲ ದಿಢೀರನೆ ಹೊರಟುಬಿಟ್ಟ. ಆತನ ನೆನಪಲ್ಲಿ ಇಂತಹದೊಂದು ಹೊತ್ತಿಗೆ ತರುವ ಮೂಲಕ ಸ್ವತಃ ವಿಠ್ಠಲ ನಡೆಸುತ್ತಿದ್ದ ಹೊಸಬರನ್ನು ಬೆಳೆಸುವ ಹಾದಿಯನ್ನು, ಜೀವದ ಗೆಳೆಯ ಶ್ರೀಪಾದರು ಮುಂದುವರೆಸಿದ್ದಾರೆ. ಈ ಕ್ರಮದಲ್ಲಿ ವಿಠ್ಠಲನ ನೆನಪು ನಮ್ಮ ನಡುವೆ ಮುಂದುವರೆಯುವುದು ನಿಜಕ್ಕೂ ಸಾರ್ಥಕ ಕೆಲಸ. ಇದೇ ಮಾದರಿಯಲ್ಲಿ ರಂಗಕಲೆಯ ಎಲ್ಲಾ ವಿಭಾಗಗಳ ಕುರಿತೂ ಕಿರುಹೊತ್ತಿಗೆಗಳು ಬರಲಿ ಎಂದು ಹಾರೈಸುತ್ತೇನೆ. ಬರೆಯುತ್ತಿರಿ ಎಂದು ನಮ್ಮ ಸಿರಿಪಾದರಿಗೆ ಒತ್ತಾಯಿಸುತ್ತೇನೆ.

                                                                        – ಬಿ.ಸುರೇಶ

೨೨ ಜುಲೈ ೨೦೨೧

ಬೆಂಗಳೂರು

ಶ್ರೀಪಾದ… ಶಿರಸಿಯ ಶ್ರೀಪಾದ…

ಯಾರನ್ನಾದರೂ ಗೆಳೆಯ ಎಂದು ಕರೆಯಬಹುದಾದ್ದು ಹೆಮ್ಮೆಯ ವಿಷಯ ಎನಿಸುವುದಾದರೆ ಆ ಪಟ್ಟಿಯಲ್ಲಿ ಮೊದಲ ಹೆಸರು ಶಿರಸಿಯ ಶ್ರೀಪಾದ ಭಟ್ಟ ಅವರದ್ದು. ನನಗೆ ಶ್ರೀಪಾದ ಕಳೆದ ಎರಡು ದಶಕದಿಂದ ಪರಿಚಯ. ಮೊದಲಿಗೆ ನಾನು, ಸರಸ್ವತಿ ಮತ್ತು ಚಿತ್ರಾ ಸೇರಿ ಬರೆದಿದ್ದ ನಾಟಕ “ರೆಕ್ಕೆ ಕಟ್ಟುವಿರಾ?”ವನ್ನು ಉಡುಪಿಯ ಶಾಲಾ ಮಕ್ಕಳಿಗೆ ಶ್ರೀಪಾದ ಭಟ್ಟ ನಿರ್ದೇಶಿಸುವ ಮೂಲಕ ನನ್ನ ಪರಿಚಯದ ವಲಯಕ್ಕೆ ಬಂದರು. ಆ ನಂತರ ನಮ್ಮ ಮೊದಲ ಭೇಟಿಯ ನೆನಪು ಮಾಸುವಷ್ಟು ಹಳೆಯ ಗೆಳೆಯರಾದರು. ನಾವಿಬ್ಬರೂ ಸೇರಿದಾಗ ಸ್ಥಳೀಯ ರಂಗಭೂಮಿಯಿಂದ ಹಿಡಿದು ಜಾಗತಿಕವಾದ ಎಲ್ಲಾ ವಿಷಯಗಳನ್ನೂ ಮಾತಾಡುತ್ತಾ ಕಳೆದಿದ್ದೇವೆ. ಶ್ರೀಪಾದರ ಮನೆಯ ಮಹಡಿಯಲ್ಲಿ ಕೂತು ರಾತ್ರಿಯಿಡೀ ಯಾವುದೋ ನಾಟಕದ ವಿಶ್ಲೇಷಣೆ ಮಾಡುತ್ತಾ, ಅದನ್ನು ವೇದಿಕೆಗೆ ತರುವ ವಿವರ ಕುರಿತು ಚರ್ಚಿಸಿದ್ದೇವೆ. ಶಿರಸಿಯ ಬೀದಿಗಳಲ್ಲಿ, ಉತ್ತರಕನ್ನಡದ ಹಲವು ಊರುಗಳಲ್ಲಿ ಓಡಾಡುತ್ತಾ ಸ್ಥಳೀಯ ರೈತರ ಸಮಸ್ಯೆಗಳನ್ನು, ದಾಂಡೇಲಿಯ ಕಾರ್ಮಿಕರ ಕಷ್ಟಗಳಿಗೆ ಕಿವಿಯಾಗಿದ್ದೇವೆ. ನನ್ನದೇ ನಿರ್ದೇಶನದ “ಪುಟ್ಟಕ್ಕನ ಹೈವೇ” ಸಿನಿಮಾವನ್ನು ಶ್ರೀಪಾದರ ನಾಯಕತ್ವದಲ್ಲಿ ಉತ್ತರಕನ್ನಡ ಜಿಲ್ಲೆಯ ಹಲವು ಊರು, ಹಳ್ಳಿಗಳಲ್ಲಿ ತೋರಿಸಿ, ನೋಡುಗರ ಜೊತೆಗೆ ಚರ್ಚೆ ಮಾಡಿದ್ದೇವೆ.

ಇದೆಲ್ಲದರ ಆಚೆಗೆ ಶ್ರೀಪಾದರು ಪ್ರತೀ ವರ್ಷ ಸಿದ್ಧಪಡಿಸುವ ಹೊಸ ನಾಟಕವನ್ನು ನೋಡಲು ಆ ಊರು – ಈ ಊರು ಎಂದು ಅಲೆದದ್ದೂ ಇದೆ. ಕೆರೆಕೋಣದಂತಹ ಹಳ್ಳಿಯಲ್ಲಿ ಶ್ರೀಪಾದರು ಕಟ್ಟಿದ “ಮಾಂಟೋನ ಕತೆಗಳು” ಆಧರಿಸಿದ ನಾಟಕವನ್ನು ನೋಡಿ ಬೆರಗಾಗಿದ್ದೂ ಇದೆ. ವೇದಿಕೆ ಯಾವುದಾದರೂ ಆಗಿರಬಹುದು, ಅದಕ್ಕೆ ಏನೆಲ್ಲಾ ಮಿತಿಗಳು ಇರಬಹುದು, ಆ ರಂಗತಂಡದಲ್ಲಿ ನುರಿತ ನಟರು ಇಲ್ಲದೇ ಇರಬಹುದು, ಹೀಗೆ ಏನೆಲ್ಲಾ ಕಷ್ಟಗಳು ಎದುರಾದರೂ ಶ್ರೀಪಾದ ಅವುಗಳನ್ನು ಮೀರುವಂತೆ ರಂಗಕೃತಿ ಕಟ್ಟುತ್ತಾರೆ. ಅದೇ ಶ್ರೀಪಾದರ ವಿಶೇಷ.

ಹಾವೇರಿ ಜಿಲ್ಲೆಯ ಶೇಷಗಿರಿ ಎಂಬ ಹಳ್ಳಿಯ ರೈತರನ್ನು ಸಂಘಟಿಸಿ, ಅಲ್ಲೊಂದು ರಂಗತಂಡ ಮಾತ್ರವಲ್ಲ, ರಂಗಮಂದಿರವನ್ನೂ ಕಟ್ಟುವುದಕ್ಕೆ ಶ್ರೀಪಾದರು ಕಾರಣರಾದರು ಎಂಬುದು ನನ್ನಂತಹವರನ್ನು ಅಚ್ಚರಿಯಲ್ಲಿರುಸುತ್ತದೆ. ಒಬ್ಬ ಶಾಲಾ ಮಾಸ್ತರು, ಉರ್ದು ಶಾಲೆಯಲ್ಲಿ ಕನ್ನಡ ಕಲಿಸುತ್ತಲೇ ತನ್ನೂರಿನ, ತನ್ನ ತಾಲ್ಲೂಕಿನ, ತನ್ನ ರಾಜ್ಯದ, ತನ್ನ ದೇಶದ ರಂಗಭೂಮಿಗೆ ನೀಡುವ ಕಾಣಿಕೆಯನ್ನು ಯಾರಾದರೂ ಗಮನಿಸದೆ ಇರಲು ಸಾಧ್ಯವೇ ಇಲ್ಲ. ಶ್ರೀಪಾದ ಮಾಸ್ತರಿಕೆ ಮಾಡುತ್ತಲೇ ಡಾಕ್ಟರ್ ಪ್ರಬಂಧ ಬರೆದಿರುವುದೂ ಹೌದು. ಆ ಪ್ರಬಂಧ ಬರೆವ ಕಾಲದಲ್ಲಿ ನನ್ನಂತಹವರ ಜೊತೆಗೆ ಮಾತಾಡುತ್ತಾ, ಒಂದು ಜಿಲ್ಲೆಯ ರಂಗಚಳುವಳಿಯನ್ನು ದಾಖಲಿಸುವ, ವಿಮರ್ಶಿಸುವ ಕ್ರಮ ಕುರಿತು ಚರ್ಚಿಸಿದ್ದೂ ಉಂಟು. ಇದೆಲ್ಲದರ ನಡುವೆಯೂ ಜಗತ್ತಿನ ಯಾವುದೋ ಮೂಲೆಯಲ್ಲಿ ಆದ ಯಾವುದೋ ರಂಗಪ್ರಯೋಗವನ್ನು ಅಂತರ್ಜಾಲದ ಮೂಲಕವೇ ನೋಡಿ, ಅದನ್ನು ನೋಡಲು ನಮಗೂ ಪ್ರೇರೇಪಣೆ ನೀಡಿರುವುದೂ ಹೌದು.

ಇಂತಹ ಕೆಲಸಗಳ ಆಚೆಗೆ ಅಂಬೇಡ್ಕರ್ ಅವರ ಜೀವನವನ್ನು ಪರಿಚಯಿಸಲು ಶ್ರೀಪಾದ ಕಟ್ಟಿದ ರಂಗಪ್ರಯೋಗ, ಕನ್ನಡದ ಮಹಾಕಾವ್ಯಗಳನ್ನು ಕಾಲೇಜು ಮಕ್ಕಳಿಗೆ ಕಲಿಸಲು ಕಟ್ಟಿದ ರಂಗಪ್ರಯೋಗ, ಬೊಳುವಾರು ಮಹಮ್ಮದ್ ಕುಂಞ ಬರೆದ “ಪಾಪು ಗಾಂಧಿ”ಯ ರಂಗಪ್ರಯೋಗ – ಹೀಗೆ ಶ್ರೀಪಾದ ಅವರ ಪ್ರಯೋಗಗಳು ಒಂದು ನಾಡಿನ ಚಿಂತನಧಾರೆಗಳನ್ನು ಶೃತಿಪಡಿಸುವಲ್ಲಿ ನಿರಂತರ ಕೆಲಸ ಮಾಡುತ್ತಿವೆ.

ಈಗಲೂ ಏನ್ ಸಮಾಚಾರ ಎಂದರೆ ಎಲ್ಲೋ ಮಾಡಿಸುತ್ತಾ ಇರುವ ಹೊಸ ಪ್ರಯೋಗ ಕುರಿತು ಮಾತಾಡುತ್ತಾ, ನಮ್ಮನ್ನು ಹಾಗೇ ದುಡಿಯಲು ಪ್ರೇರೇಪಿಸುವ ಶ್ರೀಪಾದ ನನ್ನ ಗೆಳೆಯ ಎಂಬುದೇ ನನಗೆ ಈ ಜೀವನವು ದಯಪಾಲಿಸಿದ ಅತ್ಯಂತ ದೊಡ್ಡ ಉಡುಗೊರೆ.

– ಬಿ.ಸುರೇಶ

ವಿಶ್ವ ರಂಗದಿನ ಸಂದೇಶ ೨೦೨೧

ಇಂಗ್ಲೀಷಿನಿಂದ ಕನ್ನಡಕ್ಕೆ ಅನುವಾದ: ಬಿ. ಸುರೇಶ

ಪ್ರತಿ ವರ್ಷ ಇಂಟರ್‌ನ್ಯಾಷನಲ್‌ ಥಿಯೇಟರ್‌ ಇನ್ಸ್‌ಟಿಟ್ಯೂಟ್‌ನ ಕಾರ್ಯಕಾರಿ ಸಮಿತಿಯು ಶ್ರೇಷ್ಟ ರಂಗಕರ್ಮಿಯೊಬ್ಬರನ್ನು ಗುರುತಿಸಿ ಅವರಿಗೆ ವಿಶ್ವ ರಂಗದಿನದ ಸಂದೇಶವನ್ನು ಬರೆಯಲು ಸೂಚಿಸುತ್ತದೆ. ಪ್ರತೀ ವರ್ಷ ಮಾರ್ಚ್‌ ೨೭ರಂದು ನಡೆಯುವ ವಿಶ್ವ ರಂಗದಿನದಂದು ಈ ಸಂದೇಶವನ್ನು ಜಗತ್ತಿನಾದ್ಯಂತ ರಂಗಕರ್ಮಿಗಳ ಮೂಲಕ ರಂಗಪ್ರೇಮಿಗಳಿಗೆ ತಲುಪಿಸಲಾಗುತ್ತದೆ.

೨೦೨೧ರ ವಿಶ್ವ ರಂಗದಿನದ ಸಂದೇಶ ಬರೆದ ರಂಗಕರ್ಮಿ ಯುನೈಟಡ್‌ ಕಿಂಗ್‌ಡಮ್‌ನವರಾದ ಹೆಲೆನ್‌ ಮಿರ್ರೇನ್

ಹೆಲೆನ್‌ ಮಿರ್ರೇನ್‌ ಅವರ ವಿಶ್ವ ರಂಗದಿನದ ಸಂದೇಶ

“ಇದು ಪ್ರದರ್ಶನ ಕಲೆಗಳಿಗೆ ಹಾಗೂ ಕಲಾವಿದರಿಗೆ ದುರಿತ ಕಾಲ. ರಂಗತಂತ್ರಜ್ಙರು ಮತ್ತು ರಂಗಕರ್ಮಿಗಳು ವಿಶೇಷವಾಗಿ ಮಹಿಳೆಯರು, ಸ್ವತಃ ಅಭದ್ರತೆ ಇರುವ ಪ್ರದರ್ಶನ ಕಲೆಯ ವೃತ್ತಿಯಲ್ಲಿ, ಹಲವು ಸಂಕಷ್ಟಗಳನ್ನು ಎದುರಿಸುತ್ತಿದ್ದಾರೆ.

ಈ ವೃತ್ತಿಯಲ್ಲಿನ ಅಭದ್ರತೆಯೇ ಇವೆರೆಲ್ಲರಿಗೆ ಈ ವೈರಾಣುವಿನಿಂದ ಒದಗಿದ ಸವಾಲನ್ನು ಎದುರಿಸುವ ಶಕ್ತಿ-ಸ್ಥೈರ್ಯ ಒದಗಿಸಿದೆ ಎನ್ನಬಹುದು.

ಈ ಕಾಲದಲ್ಲಿ ರಂಗಕರ್ಮಿಗಳ ಕಲ್ಪನಾಶಕ್ತಿ ಮತ್ತಷ್ಟು ಹುರಿಗೊಂಡಿದೆ. ಅದರಿಂದಾಗಿ ಹೊಸ ಮಾದರಿಯ, ಹೊಸ ಮಾಧ್ಯಮಗಳ ಮೂಲಕ ರಂಜನೆಯ ಜೊತೆಗೆ ನೋಡುಗರ ಮನಮುಟ್ಟುವ ಹಲವು ಹೊಸ ದಾರಿಗಳನ್ನು ರಂಗಕರ್ಮಿಗಳು ಕಂಡುಕೊಂಡಿದ್ದಾರೆ. ಇದಕ್ಕಾಗಿ ನಾವು ಅಂತರ್ಜಾಲ ಎಂಬ ಹೊಸ ತಂತ್ರಜ್ಞಾನಕ್ಕೂ ಧನ್ಯವಾದ ಹೇಳಬೇಕು.

ಈ ಭೂಮಿಯ ಮೇಲೆ ಮನುಷ್ಯ ಕಾಣಿಸಿಕೊಂಡ ಕಾಲದಿಂದ ಒಬ್ಬರಿಗೊಬ್ಬರು ಕತೆಗಳನ್ನು ಹೇಳುವ ಕೇಳುವ ಅಭ್ಯಾಸ ಚಾಲ್ತಿಯಲ್ಲಿದೆ. ಹಾಗಾಗಿ ರಂಗಭೂಮಿ ಎಂಬ ಅತ್ಯಂತ ಸುಂದರವಾದ ಕಲೆಯೂ ಸಹ ಈ ಜಗತ್ತು ಇರುವವರೆಗೆ ಜೀವಂತವಾಗಿ ಇರುತ್ತದೆ ಎಂಬುದರಲ್ಲಿ ನನಗೆ ಯಾವುದೇ ಅನುಮಾನವಿಲ್ಲ.

ನಾಟಕಕಾರರ, ವಿನ್ಯಾಸಕಾರರ, ನೃತ್ಯಗಾರರ, ಹಾಡುಗಾರರ, ನಟ ನಟಿಯರ ಕ್ರಿಯಾಶಕ್ತಿಯು ಎಂದಿಗೂ ಉಸಿರುಗಟ್ಟುವುದಿಲ್ಲ. ಮತ್ತೆ ಮತ್ತೆ ಹೊಸ ಚೈತನ್ಯದ ಜೊತೆಗೆ ಹೊಸ ವ್ಯಾಖ್ಯಾನಗಳ ಜೊತೆಗೆ ಈ ಜಗತ್ತನ್ನು ಹೊಸದಾಗಿ ಅರ್ಥೈಸುವ ರಂಗಪ್ರಯೋಗಗಳು ಬರುತ್ತಲೇ ಇರುತ್ತವೆ ಮತ್ತು ಅವು ನೋಡುಗರ ತಿಳುವಳಿಕೆಯನ್ನು ಹೆಚ್ಚಿಸುತ್ತಲೇ ಇರುತ್ತವೆ.

ನಾನು ಆ ದಿನಗಳಿಗಾಗಿ ಕಾಯುತ್ತಲೇ ಇರುತ್ತೇನೆ.”

– ಹೆಲೆನ್‌ ಮಿರ್ರೇನ್‌

ವಿಶ್ವರಂಗದಿನದ ಸಂದೇಶಕಾರರಾದ ಹೆಲೆನ್‌ ಮಿರ್ರೇನ್‌ ಪರಿಚಯ

ಹೆಲೆನ್‌ ಮಿರ್ರೇನ್‌ ಅವರು ಅಂತಾರಾಷ್ಟ್ರೀಯ ವೇದಿಕೆಗಳಲ್ಲಿ ಅತಿಹೆಚ್ಚು ಮನ್ನಣೆ ಗೌರವಗಳನ್ನು ಪಡೆದಿರುವ ಕಲಾವಿದೆ. ರಂಗಭೂಮಿ, ಹಿರಿತೆರೆ, ಕಿರುತೆರೆಗಳಲ್ಲಿ ನಟನೆಗಾಗಿ ಹಲವು ಪ್ರಶಸ್ತಿಗಳನ್ನು ಪಡೆದಿರುವ ಹೆಲೆನ್‌ ಅವರಿಗೆ ೨೦೦೭ರ ಅಕಾಡೆಮಿ ಗೌರವವು “ಕ್ವೀನ್‌” ಅಭಿನಯಕ್ಕಾಗಿ ದೊರೆತಿದೆ.

ರಂಗಭೂಮಿ

ನ್ಯಾಷನಲ್‌ ಯೂತ್‌ ಥಿಯೇಟರ್‌ಗಾಗಿ ಕ್ಲಿಯೋಪಾತ್ರ ಅಭಿನಯಿಸುವ ಮೂಲಕ ರಂಗ ಜಗತ್ತಿಗೆ ಪರಿಚಿತರಾದ ಹೆಲೆನ್‌ ನಂತರ ಮ್ಯಾಂಚೆಸ್ಟರ್‌ನ ರೆಪ್‌ ತಂಡದಲ್ಲಿ, ರಾಯಲ್‌ ಷೇಕ್ಸ್‌ಪಿಯರ್‌ ಕಂಪೆನಿಯಲ್ಲಿ ಹಲವು ನಾಟಕಗಳಲ್ಲಿ ಅಭಿನಯಿಸಿದರು. ಆರ್‌ಎಸ್‌ಸಿಯಲ್ಲಿ ಅವರು ಕಳೆದ ನಾಲ್ಕು ವರ್ಷಗಳ ಕಾರಣವಾಗಿ ಅವರಿಗೆ ಪೀಟರ್‌ ಬ್ರೂಕ್‌ನ ಸೆಂಟರ್‌ ಡಿ ರಿಸರ್ಚೆ ಥಿಯೇಟ್ರಲ್‌ ಸಂಸ್ಥೆಯಲ್ಲಿ ಅವಕಾಶ ದೊರೆಯಿತು. ಆ ತಂಡದ ಜೊತೆಗೆ ಆಫ್ರಿಕ ಮತ್ತು ಅಮೇರಿಕಾದ ಹಲವು ದೇಶಗಳಲ್ಲಿ ಪ್ರದರ್ಶನ ನೀಡುವುದು ಸಾಧ್ಯವಾಯಿತು.

ನಂತರ ವೆಸ್ಟ್ಎಂಡ್‌, ದಿ ಫ್ರಿಂಜ್‌, ಆರ್‌ಎಸ್‌ಸಿ, ನ್ಯಾಷನಲ್‌ ಥಿಯೇಟರ್‌ ಮತ್ತು ಯುಎಸ್‌ನ ಬ್ರಾಡ್‌ವೇಯಲ್ಲಿ ಸಹ ಹೆಲೆನ್‌ ಹಲವು ರಂಗಪ್ರಯೋಗಗಳಲ್ಲಿ ನಟಿಸಿದರು. “ಮಂಥ್‌ ಇನ್‌ ದ ಕಂಟ್ರಿ”ಗಾಗಿ ಟೋನಿ ಪ್ರಶಸ್ತಿಗೆ ನಾಮ ನಿರ್ದೇಶನ, “ಡ್ಯಾನ್ಸ್‌ ಆಫ್‌ ಡೆತ್‌”ನಲ್ಲಿ ಇಯಾನ್‌ ಮೆಕಲನ್‌ ಅವರೊಂದಿಗೆ ಬ್ರಾಡ್‌ವೇ ಥಿಯೇಟರ್‌ನಲ್ಲಿ ಅಭಿನಯಿಸಿದ್ದಾರೆ. ನಂತರ ಡಾನರ್‌ ವೇರ್‌ ಹೌಸ್‌ನಲ್ಲಿ “ಆರ್ಷಿಯನ್‌ ಡಿಸೆಂಡಿಂಗ್”‌ ಮತ್ತು ನ್ಯಾಷನಲ್‌ ಥಿಯೇಟರ್‌ನಲ್ಲಿ “ಮಾರ್ನಿಂಗ್‌ ಬಿಕಮ್ಸ್‌ ಎಲೆಕ್ಟ್ರಾ” ನಟನೆಗಾಗಿ ಒಲಿವಿಯರ್‌ ಅತ್ಯುತ್ತಮ ನಟಿ ಪ್ರಶಸ್ತಿಗೆ ನಾಮ ನಿರ್ದೇಶನ ಪಡೆದಿದ್ದಾರೆ.

೨೦೦೯ರಲ್ಲಿ ಮರಳಿ ನ್ಯಾಷನಲ್‌ ಥಿಯೇಟರ್‌ಗೆ ಬಂದು ನಿಕೊಲಸ್‌ ಹೈಟ್ನರ್‌ ನಿರ್ದೇಶನದ “ರೆಸಿನ್ಸ್‌ ಫೆಡ್ರೆ”ಯಲ್ಲಿ ಪ್ರಧಾನ ಪಾತ್ರ ನಿರ್ವಹಿಸಿದರು. ಈ ನಾಟಕವು ಎನ್‌ಟಿ ಲೈವ್‌ ಮೂಲಕ ಚಿತ್ರಿತವಾಗಿ ಜಗತ್ತಿನಾದ್ಯಂತ ಏಕಕಾಲದಲ್ಲಿ ಪ್ರದರ್ಶನ ಕಂಡ ಮೊದಲ ನಾಟಕ ಎಂದು ಚರಿತ್ರೆಯಲ್ಲಿ ದಾಖಲಾಯಿತು.

೨೦೧೩ರಲ್ಲಿ ಪೀಟರ್‌ ಮಾರ್ಗನ್‌ ರಚಿಸಿ ಸ್ಟೀಫನ್‌ ಡೌಲ್ಟ್ರಿ ನಿರ್ದೇಶಿಸಿದ “ಕ್ವೀನ್‌ ಎಲಿಜಬೆತ್‌ ಟೂ” ನಾಟಕದಲ್ಲಿ ಹೆಲೆನ್‌ ಶೀರ್ಷಿಕೆ ಪಾತ್ರದಲ್ಲಿ ಕಾಣಿಸಿಕೊಂಡರು.

ಹೆಲೆನ್‌ ಅವರಿಗೆ ಆಲಿವಿಯರ್‌ ಪ್ರಶಸ್ತಿ, ವಾಟ್ಸ್‌ ಆನ್‌ ಸ್ಟೇಜ್‌ ಪ್ರಶಸ್ತಿಗಳು ಅತ್ಯುತ್ತಮ ನಟನೆಗಾಗಿ ದೊರೆತಿದೆ. ೨೦೧೫ರಲ್ಲಿ ಅತ್ಯುತ್ತಮ ನಟಿ ಎಂದು ಟೋನಿ ಪ್ರಶಸ್ತಿ ಸಹ ದೊರೆತಿದೆ.

ಸಿನಿಮಾ ಮತ್ತು ಟಿವಿ

ಹೆಲೆನ್‌ ಅವರು ಹಿರಿತೆರೆ ಮತ್ತು ಕಿರುತೆರೆಗಳಲ್ಲಿ ಸಹ ಹಲವು ಕಾರ್ಯಕ್ರಮಗಳಲ್ಲಿ ಕಾಣಿಸಿಕೊಂಡು ಜನಪ್ರಿಯರಾಗಿದ್ದಾರೆ.

೨೦೦೩ರಲ್ಲಿ “ಡೇಮ್‌ ಆಫ್‌ ದಿ ಬ್ರಿಟಿಷ್‌ ಎಂಪೈರ್”‌ ಗೌರವವನು ಹೆಲೆನ್‌ ಮಿರ್ರೇನ್‌ ಅವರಿಗೆ ದೊರೆತಿದೆ.

ಆಕೆಯ ಬಗ್ಗೆ ಹೆಚ್ಚಿನ ಮಾಹಿತಿಗಾಗಿ http://www.helenmirren.com ನೋಡಿರಿ.

ಏಳುಬೀಳುಗಳ ನಡುವೆ ಯಶಸ್ಸಿನತ್ತ ಚಲಿಸಿದವರ ಕತೆ

(ವಿನಾಯಕರಾಮ್ ಕಲಾಗಾರ್ ಅವರ “ತೂಗುದೀಪ ದರ್ಶನ” ಪುಸ್ತಕಕ್ಕೆ ಒಂದು ಮುನ್ನುಡಿ)

ಇದೊಂದು ಅಪರೂಪದ ಪುಸ್ತಕ. ಕೊಡಗಿನ ಪುಟ್ಟ ಊರಿನಲ್ಲಿ ಬೆಳೆದ ಹುಡುಗಿಯೊಬ್ಬಳು ಹಲವು ಬಗೆಯ ಸವಾಲುಗಳನ್ನು ಎದುರಿಸಿ ಕಡೆಗೆ ಗೆಲುವಿನರಮನೆಯಲ್ಲಿ ನಗುತ್ತಾ ನಿಂತ ಕತೆ ಇಲ್ಲಿದೆ. ಹೀಗೆ ಎರಡು ಸಾಲಿನಲ್ಲಿ ಹೇಳಿದರೆ ಪುಸ್ತಕದ ಪರಿಚಯ ಪೂರ್ಣವಾಗುವುದಿಲ್ಲ. ಇದು ಮೀನ, ಮೀನಮ್ಮ, ಮೀನಾಕ್ಷಿ, ಮೀನಾಕ್ಷಿ ತೂಗುದೀಪ ಶ್ರೀನಿವಾಸ್ ಅವರ ಜೀವನ ಗಾಥೆ. ನಮ್ಮೆಲ್ಲರ ಪ್ರೀತಿಯ ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಅವರ ತಾಯಿ ಮೀನ ಅವರ ಜೀವನಯಾನದ ವಿವರಗಳು ಈ ಪುಸ್ತಕದ ಹೂರಣವಾಗಿದೆ. Continue reading ‘ಏಳುಬೀಳುಗಳ ನಡುವೆ ಯಶಸ್ಸಿನತ್ತ ಚಲಿಸಿದವರ ಕತೆ’

ಮಕ್ಕಳೆದುರಿಗೆ ಅರಳಿದ ಅಮ್ಮನ ಬದುಕು ಪುಸ್ತಕವಾಗಿದ್ದು, ಪ್ರಶಸ್ತಿ ದೊರೆತದ್ದು, ಇತ್ಯಾದಿ…

(ವಿಜಯವಾಣಿ ಪತ್ರಿಕೆಗಾಗಿ ಅಮ್ಮನ (ಡಾ.ವಿಜಯಾ) ಆತ್ಮಚರಿತ್ರೆ ಕುರಿತಂತೆ ಬರೆದ ಟಿಪ್ಪಣಿ)

ಹೌದು. ನಾನು ಎರಡು ಅಥವಾ ಮೂರನೇ ತರಗತಿಗೆ ಹೋಗುವಾಗ ಅಮ್ಮ ಸಹ ಪದವಿಪೂರ್ವ ಶಿಕ್ಷಣಕ್ಕಾಗಿ ಸಂಜೆ ಕಾಲೇಜಿಗೆ ಸೇರಿದರು. ನಾನು ಹಗಲಿನಲ್ಲಿ ನನ್ನ ಶಾಲೆಯ ಪಾಠಗಳನ್ನು ಓದುವಾಗ ಅಮ್ಮ ಅಡಿಗೆ ಮಾಡುತ್ತಲೇ ಸೋಷಿಯಾಲಜಿ, ಪೊಲಿಟಿಕಲ್ ಸೈನ್ಸ್ ಓದುತ್ತಿದ್ದರು. ಹತ್ತನೇ ತರಗತಿವರೆಗೆ ಕನ್ನಡ ಮಾಧ್ಯಮದಲ್ಲಿ ಕಲಿತಾಕೆಗೆ ಪಿಯುಸಿಯಲ್ಲಿ ಇಂಗ್ಲೀಷ್ ಮೂಲಕ ಕಲಿಯು ಬೇಕಾದ ಕಷ್ಟವಿತ್ತು. ಆದರೂ ಆಕೆ ನಮ್ಮ ಜೊತೆಗೆ ಓದುತ್ತಾ ಓದುತ್ತಾ ಸ್ನಾತಕೋತ್ತರ ಕನ್ನಡ ಎಂಎ ವರೆಗೆ ಓದಿದ್ದು, ಡಾಕ್ಟರೇಟ್ ಪ್ರಬಂಧ ಬರೆದದ್ದು ಎಲ್ಲವೂ ನನ್ನಂತಹವರಿಗೆ ಸದಾ ಕಾಲ ಮಾದರಿಯಾಗಿ ಇರುವಂತಹ ಸಂಗತಿ. `ವಯಸ್ಸು ಎಷ್ಟಾದರೇನು? ಬದುಕು ಯಾವ ಕಷ್ಟ ಕೊಟ್ಟರೇನು? ನಮ್ಮ ಕನಸುಗಳ ಮೆಟ್ಟಿಲುಗಳನ್ನ ನಾವು ಏರಲೇಬೇಕು’ ಎಂಬ ಸತ್ಯವನ್ನು ಸ್ವತಃ ಬದುಕಿ ತೋರಿಸಿದಾಕೆ ನಮ್ಮಮ್ಮ. ಹಾಗಾಗಿಯೇ ನಾನು ನನಗಾಗಿ ಆಗಾಗ ಹೇಳಿಕೊಳ್ಳುತ್ತಾ ಇರುತ್ತೇನೆ, “ಇಂತಹ ಅಮ್ಮ ಸಿಗದೆ ಹೋಗಿದ್ದರೆ ನೀನು ಈಗೇನಾಗಿದ್ದೀಯೋ ಅದಾಗುತ್ತಾ ಇರಲಿಲ್ಲ” ಎಂದು. Continue reading ‘ಮಕ್ಕಳೆದುರಿಗೆ ಅರಳಿದ ಅಮ್ಮನ ಬದುಕು ಪುಸ್ತಕವಾಗಿದ್ದು, ಪ್ರಶಸ್ತಿ ದೊರೆತದ್ದು, ಇತ್ಯಾದಿ…’


ಕೆಲವು ಪುಟಗಳು…

ಈವರೆಗೆ ಇಲ್ಲಿ ಸುಳಿದಾಡಿದವರು...

  • 105,109 ಜನರು