Posts Tagged 'Theatre'

ಶ್ರೀಪಾದ… ಶಿರಸಿಯ ಶ್ರೀಪಾದ…

ಯಾರನ್ನಾದರೂ ಗೆಳೆಯ ಎಂದು ಕರೆಯಬಹುದಾದ್ದು ಹೆಮ್ಮೆಯ ವಿಷಯ ಎನಿಸುವುದಾದರೆ ಆ ಪಟ್ಟಿಯಲ್ಲಿ ಮೊದಲ ಹೆಸರು ಶಿರಸಿಯ ಶ್ರೀಪಾದ ಭಟ್ಟ ಅವರದ್ದು. ನನಗೆ ಶ್ರೀಪಾದ ಕಳೆದ ಎರಡು ದಶಕದಿಂದ ಪರಿಚಯ. ಮೊದಲಿಗೆ ನಾನು, ಸರಸ್ವತಿ ಮತ್ತು ಚಿತ್ರಾ ಸೇರಿ ಬರೆದಿದ್ದ ನಾಟಕ “ರೆಕ್ಕೆ ಕಟ್ಟುವಿರಾ?”ವನ್ನು ಉಡುಪಿಯ ಶಾಲಾ ಮಕ್ಕಳಿಗೆ ಶ್ರೀಪಾದ ಭಟ್ಟ ನಿರ್ದೇಶಿಸುವ ಮೂಲಕ ನನ್ನ ಪರಿಚಯದ ವಲಯಕ್ಕೆ ಬಂದರು. ಆ ನಂತರ ನಮ್ಮ ಮೊದಲ ಭೇಟಿಯ ನೆನಪು ಮಾಸುವಷ್ಟು ಹಳೆಯ ಗೆಳೆಯರಾದರು. ನಾವಿಬ್ಬರೂ ಸೇರಿದಾಗ ಸ್ಥಳೀಯ ರಂಗಭೂಮಿಯಿಂದ ಹಿಡಿದು ಜಾಗತಿಕವಾದ ಎಲ್ಲಾ ವಿಷಯಗಳನ್ನೂ ಮಾತಾಡುತ್ತಾ ಕಳೆದಿದ್ದೇವೆ. ಶ್ರೀಪಾದರ ಮನೆಯ ಮಹಡಿಯಲ್ಲಿ ಕೂತು ರಾತ್ರಿಯಿಡೀ ಯಾವುದೋ ನಾಟಕದ ವಿಶ್ಲೇಷಣೆ ಮಾಡುತ್ತಾ, ಅದನ್ನು ವೇದಿಕೆಗೆ ತರುವ ವಿವರ ಕುರಿತು ಚರ್ಚಿಸಿದ್ದೇವೆ. ಶಿರಸಿಯ ಬೀದಿಗಳಲ್ಲಿ, ಉತ್ತರಕನ್ನಡದ ಹಲವು ಊರುಗಳಲ್ಲಿ ಓಡಾಡುತ್ತಾ ಸ್ಥಳೀಯ ರೈತರ ಸಮಸ್ಯೆಗಳನ್ನು, ದಾಂಡೇಲಿಯ ಕಾರ್ಮಿಕರ ಕಷ್ಟಗಳಿಗೆ ಕಿವಿಯಾಗಿದ್ದೇವೆ. ನನ್ನದೇ ನಿರ್ದೇಶನದ “ಪುಟ್ಟಕ್ಕನ ಹೈವೇ” ಸಿನಿಮಾವನ್ನು ಶ್ರೀಪಾದರ ನಾಯಕತ್ವದಲ್ಲಿ ಉತ್ತರಕನ್ನಡ ಜಿಲ್ಲೆಯ ಹಲವು ಊರು, ಹಳ್ಳಿಗಳಲ್ಲಿ ತೋರಿಸಿ, ನೋಡುಗರ ಜೊತೆಗೆ ಚರ್ಚೆ ಮಾಡಿದ್ದೇವೆ.

ಇದೆಲ್ಲದರ ಆಚೆಗೆ ಶ್ರೀಪಾದರು ಪ್ರತೀ ವರ್ಷ ಸಿದ್ಧಪಡಿಸುವ ಹೊಸ ನಾಟಕವನ್ನು ನೋಡಲು ಆ ಊರು – ಈ ಊರು ಎಂದು ಅಲೆದದ್ದೂ ಇದೆ. ಕೆರೆಕೋಣದಂತಹ ಹಳ್ಳಿಯಲ್ಲಿ ಶ್ರೀಪಾದರು ಕಟ್ಟಿದ “ಮಾಂಟೋನ ಕತೆಗಳು” ಆಧರಿಸಿದ ನಾಟಕವನ್ನು ನೋಡಿ ಬೆರಗಾಗಿದ್ದೂ ಇದೆ. ವೇದಿಕೆ ಯಾವುದಾದರೂ ಆಗಿರಬಹುದು, ಅದಕ್ಕೆ ಏನೆಲ್ಲಾ ಮಿತಿಗಳು ಇರಬಹುದು, ಆ ರಂಗತಂಡದಲ್ಲಿ ನುರಿತ ನಟರು ಇಲ್ಲದೇ ಇರಬಹುದು, ಹೀಗೆ ಏನೆಲ್ಲಾ ಕಷ್ಟಗಳು ಎದುರಾದರೂ ಶ್ರೀಪಾದ ಅವುಗಳನ್ನು ಮೀರುವಂತೆ ರಂಗಕೃತಿ ಕಟ್ಟುತ್ತಾರೆ. ಅದೇ ಶ್ರೀಪಾದರ ವಿಶೇಷ.

ಹಾವೇರಿ ಜಿಲ್ಲೆಯ ಶೇಷಗಿರಿ ಎಂಬ ಹಳ್ಳಿಯ ರೈತರನ್ನು ಸಂಘಟಿಸಿ, ಅಲ್ಲೊಂದು ರಂಗತಂಡ ಮಾತ್ರವಲ್ಲ, ರಂಗಮಂದಿರವನ್ನೂ ಕಟ್ಟುವುದಕ್ಕೆ ಶ್ರೀಪಾದರು ಕಾರಣರಾದರು ಎಂಬುದು ನನ್ನಂತಹವರನ್ನು ಅಚ್ಚರಿಯಲ್ಲಿರುಸುತ್ತದೆ. ಒಬ್ಬ ಶಾಲಾ ಮಾಸ್ತರು, ಉರ್ದು ಶಾಲೆಯಲ್ಲಿ ಕನ್ನಡ ಕಲಿಸುತ್ತಲೇ ತನ್ನೂರಿನ, ತನ್ನ ತಾಲ್ಲೂಕಿನ, ತನ್ನ ರಾಜ್ಯದ, ತನ್ನ ದೇಶದ ರಂಗಭೂಮಿಗೆ ನೀಡುವ ಕಾಣಿಕೆಯನ್ನು ಯಾರಾದರೂ ಗಮನಿಸದೆ ಇರಲು ಸಾಧ್ಯವೇ ಇಲ್ಲ. ಶ್ರೀಪಾದ ಮಾಸ್ತರಿಕೆ ಮಾಡುತ್ತಲೇ ಡಾಕ್ಟರ್ ಪ್ರಬಂಧ ಬರೆದಿರುವುದೂ ಹೌದು. ಆ ಪ್ರಬಂಧ ಬರೆವ ಕಾಲದಲ್ಲಿ ನನ್ನಂತಹವರ ಜೊತೆಗೆ ಮಾತಾಡುತ್ತಾ, ಒಂದು ಜಿಲ್ಲೆಯ ರಂಗಚಳುವಳಿಯನ್ನು ದಾಖಲಿಸುವ, ವಿಮರ್ಶಿಸುವ ಕ್ರಮ ಕುರಿತು ಚರ್ಚಿಸಿದ್ದೂ ಉಂಟು. ಇದೆಲ್ಲದರ ನಡುವೆಯೂ ಜಗತ್ತಿನ ಯಾವುದೋ ಮೂಲೆಯಲ್ಲಿ ಆದ ಯಾವುದೋ ರಂಗಪ್ರಯೋಗವನ್ನು ಅಂತರ್ಜಾಲದ ಮೂಲಕವೇ ನೋಡಿ, ಅದನ್ನು ನೋಡಲು ನಮಗೂ ಪ್ರೇರೇಪಣೆ ನೀಡಿರುವುದೂ ಹೌದು.

ಇಂತಹ ಕೆಲಸಗಳ ಆಚೆಗೆ ಅಂಬೇಡ್ಕರ್ ಅವರ ಜೀವನವನ್ನು ಪರಿಚಯಿಸಲು ಶ್ರೀಪಾದ ಕಟ್ಟಿದ ರಂಗಪ್ರಯೋಗ, ಕನ್ನಡದ ಮಹಾಕಾವ್ಯಗಳನ್ನು ಕಾಲೇಜು ಮಕ್ಕಳಿಗೆ ಕಲಿಸಲು ಕಟ್ಟಿದ ರಂಗಪ್ರಯೋಗ, ಬೊಳುವಾರು ಮಹಮ್ಮದ್ ಕುಂಞ ಬರೆದ “ಪಾಪು ಗಾಂಧಿ”ಯ ರಂಗಪ್ರಯೋಗ – ಹೀಗೆ ಶ್ರೀಪಾದ ಅವರ ಪ್ರಯೋಗಗಳು ಒಂದು ನಾಡಿನ ಚಿಂತನಧಾರೆಗಳನ್ನು ಶೃತಿಪಡಿಸುವಲ್ಲಿ ನಿರಂತರ ಕೆಲಸ ಮಾಡುತ್ತಿವೆ.

ಈಗಲೂ ಏನ್ ಸಮಾಚಾರ ಎಂದರೆ ಎಲ್ಲೋ ಮಾಡಿಸುತ್ತಾ ಇರುವ ಹೊಸ ಪ್ರಯೋಗ ಕುರಿತು ಮಾತಾಡುತ್ತಾ, ನಮ್ಮನ್ನು ಹಾಗೇ ದುಡಿಯಲು ಪ್ರೇರೇಪಿಸುವ ಶ್ರೀಪಾದ ನನ್ನ ಗೆಳೆಯ ಎಂಬುದೇ ನನಗೆ ಈ ಜೀವನವು ದಯಪಾಲಿಸಿದ ಅತ್ಯಂತ ದೊಡ್ಡ ಉಡುಗೊರೆ.

– ಬಿ.ಸುರೇಶ

ಮಕ್ಕಳೆದುರಿಗೆ ಅರಳಿದ ಅಮ್ಮನ ಬದುಕು ಪುಸ್ತಕವಾಗಿದ್ದು, ಪ್ರಶಸ್ತಿ ದೊರೆತದ್ದು, ಇತ್ಯಾದಿ…

(ವಿಜಯವಾಣಿ ಪತ್ರಿಕೆಗಾಗಿ ಅಮ್ಮನ (ಡಾ.ವಿಜಯಾ) ಆತ್ಮಚರಿತ್ರೆ ಕುರಿತಂತೆ ಬರೆದ ಟಿಪ್ಪಣಿ)

ಹೌದು. ನಾನು ಎರಡು ಅಥವಾ ಮೂರನೇ ತರಗತಿಗೆ ಹೋಗುವಾಗ ಅಮ್ಮ ಸಹ ಪದವಿಪೂರ್ವ ಶಿಕ್ಷಣಕ್ಕಾಗಿ ಸಂಜೆ ಕಾಲೇಜಿಗೆ ಸೇರಿದರು. ನಾನು ಹಗಲಿನಲ್ಲಿ ನನ್ನ ಶಾಲೆಯ ಪಾಠಗಳನ್ನು ಓದುವಾಗ ಅಮ್ಮ ಅಡಿಗೆ ಮಾಡುತ್ತಲೇ ಸೋಷಿಯಾಲಜಿ, ಪೊಲಿಟಿಕಲ್ ಸೈನ್ಸ್ ಓದುತ್ತಿದ್ದರು. ಹತ್ತನೇ ತರಗತಿವರೆಗೆ ಕನ್ನಡ ಮಾಧ್ಯಮದಲ್ಲಿ ಕಲಿತಾಕೆಗೆ ಪಿಯುಸಿಯಲ್ಲಿ ಇಂಗ್ಲೀಷ್ ಮೂಲಕ ಕಲಿಯು ಬೇಕಾದ ಕಷ್ಟವಿತ್ತು. ಆದರೂ ಆಕೆ ನಮ್ಮ ಜೊತೆಗೆ ಓದುತ್ತಾ ಓದುತ್ತಾ ಸ್ನಾತಕೋತ್ತರ ಕನ್ನಡ ಎಂಎ ವರೆಗೆ ಓದಿದ್ದು, ಡಾಕ್ಟರೇಟ್ ಪ್ರಬಂಧ ಬರೆದದ್ದು ಎಲ್ಲವೂ ನನ್ನಂತಹವರಿಗೆ ಸದಾ ಕಾಲ ಮಾದರಿಯಾಗಿ ಇರುವಂತಹ ಸಂಗತಿ. `ವಯಸ್ಸು ಎಷ್ಟಾದರೇನು? ಬದುಕು ಯಾವ ಕಷ್ಟ ಕೊಟ್ಟರೇನು? ನಮ್ಮ ಕನಸುಗಳ ಮೆಟ್ಟಿಲುಗಳನ್ನ ನಾವು ಏರಲೇಬೇಕು’ ಎಂಬ ಸತ್ಯವನ್ನು ಸ್ವತಃ ಬದುಕಿ ತೋರಿಸಿದಾಕೆ ನಮ್ಮಮ್ಮ. ಹಾಗಾಗಿಯೇ ನಾನು ನನಗಾಗಿ ಆಗಾಗ ಹೇಳಿಕೊಳ್ಳುತ್ತಾ ಇರುತ್ತೇನೆ, “ಇಂತಹ ಅಮ್ಮ ಸಿಗದೆ ಹೋಗಿದ್ದರೆ ನೀನು ಈಗೇನಾಗಿದ್ದೀಯೋ ಅದಾಗುತ್ತಾ ಇರಲಿಲ್ಲ” ಎಂದು. Continue reading ‘ಮಕ್ಕಳೆದುರಿಗೆ ಅರಳಿದ ಅಮ್ಮನ ಬದುಕು ಪುಸ್ತಕವಾಗಿದ್ದು, ಪ್ರಶಸ್ತಿ ದೊರೆತದ್ದು, ಇತ್ಯಾದಿ…’

27 ಮಾರ್ಚ್ 2020ರ ವಿಶ್ವ ರಂಗದಿನದ ಸಂದೇಶ – (ಸಂಕ್ಷಿಪ್ತ ರೂಪ)

ಪಾಕಿಸ್ತಾನಿ ರಂಗಕರ್ಮಿ ಶಾಹೀದ್ ನದೀಮ್(^1) ಅವರ ಸಂದೇಶ

ಕನ್ನಡ ಅನುವಾದ: ಬಿ.ಸುರೇಶ

(ಸಂಕ್ಷಿಪ್ತ ರೂಪ)

ಅಜೋಕ ಥಿಯೇಟರ್(^2) ಅಭಿನಯಿಸುವ ಸೂಫಿಸಂತ(^3) ಬುಲ್ಲೇಹ್ ಷಾನ(^4) ಕತೆ ಇರುವ `ಬುಲ್ಲಾ’ ನಾಟಕದ ಪ್ರದರ್ಶನವಿದ್ದ ಒಂದು ದಿನ ಒಬ್ಬ ಮುದುಕ ಪುಟ್ಟ ಹುಡುಗನ ಜೊತೆಗೆ ನಾಟಕದ ಬುಲ್ಲಾ ಪಾತ್ರಧಾರಿಯ ಬಳಿಗೆ ಬಂದ, “ನನ್ನ ಮೊಮ್ಮಗನ ಆರೋಗ್ಯ ಸರಿಯಿಲ್ಲ. ನೀನು ಅವನಿಗೆ ಒಮ್ಮೆ ಆಶೀರ್ವಾದ ಮಾಡುತ್ತೀಯ” ಎಂದು ಕೇಳಿದ. ಆ ಪಾತ್ರಧಾರಿಯು ಬೆರಗಾಗಿ, “ಬಾಬಾಜಿ(^5), ನಾನು ಬುಲ್ಲೇಷಾ ಅಲ್ಲ, ಕೇವಲ ಆ ಪಾತ್ರ ಮಾಡುವ ನಟ” ಎಂದ. ಆ ವೃದ್ಧನು, “ಮಗು, ನೀನು ಕೇವಲ ನಟನಲ್ಲ. ನೀನು ಬುಲ್ಲೇಹ್ ಷಾನ ಅವತಾರ(^6)” ಎಂದ. ಆ ಕ್ಷಣದಲ್ಲಿ ನಮ್ಮ ರಂಗಸಾಧ್ಯತೆಗೆ ಹೊಸ ಕಲ್ಪನೆಯೊಂದು ಸೇರಿಕೊಂಡಿತು. ಪಾತ್ರವನ್ನು ಅಭಿನಯಿಸುವ ಕಲಾವಿದ ಸ್ವತಃ ಆ ಪಾತ್ರದ ಅವತಾರ ಎಂಬಂತೆ ನಟನೆ ರೂಢಿಸಿಕೊಳ್ಳುವ ಕಲ್ಪನೆ ಅದು. Continue reading ’27 ಮಾರ್ಚ್ 2020ರ ವಿಶ್ವ ರಂಗದಿನದ ಸಂದೇಶ – (ಸಂಕ್ಷಿಪ್ತ ರೂಪ)’

27 ಮಾರ್ಚ್ 2020ರ ವಿಶ್ವ ರಂಗದಿನದ ಸಂದೇಶ (ಪೂರ್ಣಪಾಠ)

ಪಾಕಿಸ್ತಾನಿ ರಂಗಕರ್ಮಿ ಶಾಹೀದ್ ನದೀಮ್ ಅವರ ಸಂದೇಶ

ಕನ್ನಡ ಅನುವಾದ: ಬಿ.ಸುರೇಶ

(ಸಂದೇಶದ ಪೂರ್ಣಪಾಠ)

2020ರ ವಿಶ್ವರಂಗದಿನದ ಸಂದೇಶವನ್ನು ನೀಡುವ ಅವಕಾಶ ದೊರೆತಿರುವುದು ಬಹು ದೊಡ್ಡ ಗೌರವ. ಇದು ಎಂತಹ ವ್ಯಕ್ತಿಯನ್ನೂ ವಿನೀತನಾಗಿಸುತ್ತದೆ ಎಂಬುದು ಒಂದೆಡೆಯಾದರೆ, ಐಟಿಐ (ಇಂಟರ್‌ನ್ಯಾಷನಲ್ ಥಿಯೇಟರ್ ಇನ್ಸ್ಟಿಟ್ಯೂಟ್) ಸಂಸ್ಥೆಯು ಪಾಕಿಸ್ತಾನದ ರಂಗಚಳವಳಿಗೆ ಮತ್ತು ಪಾಕಿಸ್ತಾನದಂತಹ ದೇಶಕ್ಕೆ ಈ ಅವಕಾಶ ಒದಗಿಸಿರುವುದು ಬಹುದೊಡ್ಡ ಸಂಭ್ರಮದ ಸಂಗತಿಯೂ ಹೌದು. ಇದು ಅಜೋಕ ಥಿಯೇಟರ್ ಸ್ಥಾಪಕರಾದ ಮತ್ತು ನಮ್ಮ ರಂಗಭೂಮಿಯ ಬಹುದೊಡ್ಡ ಮಾದರಿಗಳಲ್ಲಿ ಒಬ್ಬರಾದ, ನನ್ನ ಜೀವನದ ಜೊತೆಗಾತಿಯಾಗಿದ್ದ, ಎರಡು ವರ್ಷಗಳ ಹಿಂದೆ ನಮ್ಮನ್ನಗಲಿದ ಮದೀಹ ಗೌಹರ್(^1) ಅವರ ಕೆಲಸಗಳಿಗೆ ಸಂದ ಗೌರವ ಎಂದು ಭಾವಿಸುತ್ತೇನೆ. ಇಂದು ರಂಗಚಳವಳಿಯನ್ನು ಉಳಿಸಿ ಬೆಳೆಸುವುದು ಯಾವುದೇ ರಂಗತಂಡಕ್ಕೆ ಬಹು ಕಷ್ಟದ ಕೆಲಸ ಹಾಗೂ ತ್ರಾಸಿನ ಪ್ರಯಾಣ. Continue reading ’27 ಮಾರ್ಚ್ 2020ರ ವಿಶ್ವ ರಂಗದಿನದ ಸಂದೇಶ (ಪೂರ್ಣಪಾಠ)’


ಕೆಲವು ಪುಟಗಳು…

ಈವರೆಗೆ ಇಲ್ಲಿ ಸುಳಿದಾಡಿದವರು...

  • 105,109 ಜನರು